Verndun náttúru og menningarminja

Náttúra landsins er undirstaða vaxtar í ferðaþjónustu og þar með efnahagsvaxtar undanfarinna ára. Björt framtíð leggur þunga áherslu á að stefnumarkandi áætlun stjórnvalda um uppbyggingu, rekstur og viðhald innviða í þágu náttúruverndar og til verndar menningarminjum verði tryggt fjármagn til styrktar áðurnefndri undirstöðu. Flokkurinn leggur einnig áherslu á mikilvægi landvörslu í þessu samhengi og að stefnt verði að því að tryggja stöðu greinarinnar í náttúrvernd á Íslandi.

Hafa verður í huga spurninguna um hvað sé náttúruvernd. Er það eðlileg náttúruvernd að leggja áherslu á að viðhalda rofnum vistkerfum og auðnum landsins? Er ekki eðlilegri náttúruvernd á tímum eyðimerkurmyndunar og loftslagsbreytinga að leggja áherslu á að klæða landið gróðri á ný? Stórauka þarf útbreiðslu birkiskóganna, koma stjórn á beitarmál og rækta nytjaskóga á láglendisauðnum og bújörðum. Öll skógrækt á Íslandi lýtur ströngum skipulagsreglum og vel er gætt að minjum og náttúruverðmætum.